The Philippine Online Chronicles

Dear Lady S:

Isa po ako sa libo-libong tagahanga at tagasubaybay ng inyong “Love Advice” dito sa POC. Ang galing-galing ninyong magbigay ng payo at talagang prangkahan kung prangkahan.

Anyway, gusto ko sanang isangguni sa inyo ang aking problema hinggil sa babaeng nililigawan ko. Ang pangalan niya ay Angelita. Na-meet ko siya last year through a common friend.

Actually, nung una kong na-meet si Angelita ay may naramdaman na talaga ako sa kaniya. Feel na feel ko na natagpuan ko na ang pinakamagandang babae sa buong mundo sa katauhan niya. Lumipas ang mahigit anim na buwan at inamin ko sa kaniya ang tunay kong nararamdaman.Simula noon ay ang mga gabi-gabing telebabad, kulitan sa text, at sa facebook.

Una kaming pormal na nag-date noong Disyembre. Sa date na iyon, naghawak ang aming mga kamay, at talagang langit ang naramdaman ko noon. Nasundan pa ito ng mga sumunod na mga date.

Ang kaso Lady S, pagdating ng Pebrero ay nanlamig ang pakikitungo ni Angelita sa akin. Hindi na siya madalas magtext at hindi na rin siya tumatawag sa bahay. Bihira na rin kaming magkita. At ang nakakalungkot ay may mga puna siya sa akin na sa tingin ko ay may point naman.

Tatlo ang pangunahing puna niya sa akin. Una, ang korni ko raw humirit. Sa sobrang kakornihan ko raw ay natatawa na lang siya. Pangalawa, ang “generic” ko raw magtext. Eh paano Lady S, sadyang tamad talaga akong pumindot sa cellphone. At pangatlo, parang “nambobola” na lang daw ako. Pero Lady S, sinasabi ko lang naman sa kaniya ang tunay kong nararamdaman nang walang halong pambobola. Hindi ko kailangang magpaka-cool o magpaka-deep, kasi simpleng tao lang ako.

Lady S, ano po ang inyong maipapayo sa akin? Paano ko po mapupukaw ang kaniyang dating sweetness sa akin?

Umaasang lubos,

Santino

Dear Santino:

Alam mo ba kung ano ang ibig sabihin ng shung-shung? Actually, ang root word niyan ay shunga (nakuha pang magkaroon ng root word, ano?) meaning tangengot o sa mas less brutal na pananalita ay aanga-anga. Bakit 'kamo? Dahil yang babaeng tinutukoy mo ay nag-iinarte lang para mas mapansin mo. Napakahina mo naman talaga sa pakiramdaman. Una, korni ka raw pero natatawa siya. Ibig sabihin, kinikilig sa kakornihan mo. Ikalawa, pinaparinggan ka nang mag text palagi, aaminin mo pang tamad ka! Hindi ba't senyales iyan na humihingi siya ng mas malaking time and attention? At ikatlo, para ka na lang daw nambobola. Ang definition nun slight na naniniwala siya sa mga sinasabi mo pero may pagdududa kasi nga shung-shung ka!

Upang mapukaw mo ang dating sweetness niya sa iyo na all of a sudden ay umasim dahil nga para kang natutulog sa pansitan, aba'y karirin mo ang pag earn ng pogi points. Kung dati kang thoughtful, sobrang magpa-extra thoughtful ka (goodluck sa gastos mo sa tsokolate, flowers, etc.) Kung before ay madalang pa sa patak ng ulan sa tag-araw ang pagti-text mo, magpa unlitext ka -yung maninigas na ang mga daliri mo sa kaka text, di pa rin nauubos ang load mo. At para naman mapatunayan mo na walang halong bola (ows?) ang mga banat mo sa kanya, isali mo ang iyong nanay sa inyong usapan upang patunayan sa kanya na hindi kayo lahi ng mga sinungaling.

Alam mo Santino, ang relasyon, gaya ng isang masarap na kape, dapat ay maintain ang temperature niyan. Hwag mong pabayaang lumamig na parang ilong ng pusa. The key word is “seduce”. Tease. Hindi kumukupas ang kilig. Ang excitement. Ang lagablab. Kung papatay-patay ka at magiging pabaya, at higit sa lahat ay walang malay tao sa mga kaek-ekan ng mga babae, palista ka na dun sa mga magpapapako sa krus sa Mahal na Araw.

Habang asa mag syota stage pa lang kayo, bumirit ka na. Natural, may inaaasam-asam ka pa, eh. I am 100 percent sure, kapag nagsasama na kayo bilang mag-asawa, aysus, tingnan ko lang kung pansinin mo pa ang mga tantrums niyan. Sa totoo lang, iyan ang pinaka bonggang bonggang chapter ng magsing-irog- habang mag syota pa lang. Kaya i'm pretty sure, ini-enjoy na ng girlfriend mo ang pagmamaltrato sa iyo.

Nawa'y manauli ang dating init. O simulan mo na ang maglakad nang paluhod sa Baclaran bago siya mag-fly away.

Lady S

Photo: “crazy in love” by Giorgos, c/o Flickr. Some Rights Reserved