The Philippine Online Chronicles

Dear Lady S,

Ilang beses ko nang nabasa sa inyong column ang mga masalimuot na kwento ng pagmamahal, lalung-lalo na sa pagitan ng magkaibigan na nasa bingit ng pag-iibigan.

Madalas namin itong pagtalunan ng aking mga kabarkadang lalaki. Ilang ulit na rin kasi akong natabla ng mga babaeng pinakitaan ko ng espesyal na pagtingin — yung beyond friendship. Madalas kasi akong ma-”friend zone” — ang siste'y “kaibigan” lang ang tingin sa akin.

Kaya siguro naging ganoon ang mentality ko: Kung ang babae'y ka-”tropa” lamang, hanggang 'dun lang ang inyong relasyon. Katropa, kabarkada, kaibigang di mo kailanman makakatuluyan, kahit sa loob-loob mo'y mahal mo siya nang wagas at tunay.

Kaya kapag kinakantiyawan ako ng mga lalake (at ilang mga babae) kong kabarkada sa isang magandang dilag na nagiging ka-tropa ko rin, ang bukambibig ko, “Pare, wag 'yan, tropa 'yan” na susundan ng kanilang malalakas na halakhak at kantiyaw.

Katulad ng babaeng ito na kamakailan ay nakilala ko. Napaka-friendly niya, pareho kaming mahilig sa musika, at sobra akong nakaka-relate sa kanya at sa tingin ko ay pagkakaibigan ang nabuo sa pagitan namin at hindi naman lumalabis doon. Tropa ang tingin ko sa kanya, at sa malamang ay tropa din ang tingin niya sa akin. Pero parang may kislap sa kanyang matang kulay kastanyo, na sa tuwing nagkakasalubong ang aming tingin ay lumiliwanag nang husto ang aking buhay. Parang mahal ko na siya, pero pinipilit ko pa rin siyang tingnan bilang ka-tropa.

Ang problema, Lady S, sa araw-araw naming pagkikita, ay lalo kong pinipigilan ang aking damdamin. Pinananatili ko pa rin ang espasyo ng pagiging mag-tropa sa pagitan namin. Ngunit habang nananatili ang damdaming iyon ay sumisidhi ang aking pagtingin sa kaniya. Parang gusto ko sana siyang makasama habangbuhay. Parang gusto kong maging akin na siya.

Lady S, nahihirapan na ako. Ikaw lang ang masasandalan ko sa ganitong sitwasyon. Makatuwiran bang ligawan at makatuluyan ang isang ka-tropa? Ayoko nang maulit ang mga pagkakamali ng nakaraan.

Tulungan mo sana ako.

Losser Me

At bakit naman tino-torture mo ang iyong sarili? Kung mahal mo, sabihin mo! Pag nag-inarte, halikan mo! Palagi tayong nagkakamali pero 'dun tayo matututo. Now, kung hindi ka pa rin natututo, e di forever kang magkakamali.

Ano ba, araw-araw me eksenang ganyan sa world. Friendship sa simula. Then mai-in love. Ang masakit, kung isa lang ang na-in love at 'yung isa, friend lang talaga. Patibayan lang 'yan ng baga. Oo, masakit. Pero masarap pa ring magmahal kahit talunan. Mahal mo, eh. Kulit kasi ng pagmamahal na 'yan. Saan ka ba magiging masaya? Sa pagpipigil ba nang panggigigil o mag play safe na hindi na masasaktang muli?

Ako ang tanungin mo. Ang answer, pakakawalan ko ang laman ng puso ko. Fly galore ang drama. Sasabihin ko pa rin, hayup ka, mahal na mahal kita kahit parang hangin lang ako na dumadaan sa pandama mo!

At ikaw naman, member ka agad ng losing team. Higupin mo muna ang kape para malaman mo kung mainit. Ihakbang mo muna ang unang paa bago lumubog sa kumunoy -- ibig sabihin, huwag kang matakot sumubo -- este sumubok pala. Eh paano kung pakiyems lang pala ang girlalu na yan tas 'yun pala eh naghihingalo na sa paghihintay na ligawan mo? Naku, malamang na sumisinghot ka na ng rugby sa pagdadalamhati dahil sa kaduwagan mo. Kabagal-bagalan ka, kuya! Huwag nang isaalang-alang ang poise, sugurin na siya at aatakihin na ako sa pagpapatumpik-tumpik mo!

Now, kung tumataginting na “sorry, tropa lang talaga tayo” ang sagot, huwag kang sumuko! Ganyan talaga ang bayaning nasusugatan, aabutin ng 100 years pero hindi mapuputol ang pag-asang siya pa rin ang magwawagi. At kung hindi na makakayanan ng spinal cord mo ang bigat ng “no” for an answer, mag scout ka na ng billboard kung saan ka puwedeng tumalon (joke lang!). Ang ibig kong sabihin, kung na-exhaust mo nang lahat ang posible at imposibleng paraan to win her love, eh talagang naririmarim naman sa iyo ang babaing walang pakialam sa mundo, kuya naman, sandamakmak ang lahi ng mga babaing vaklesh ni Lola Eba. Moment na talaga upang maghanap ng ibang kandungan -- 'yung naglalagablab sa pagmamahal.

Tigilan na ang useless stress. Hindi kita dadalawin sa ospital ng mga nabaliw sa pag-ibig at ayokong mahawa sa kamalasan mo. At kung truk na bilib ka sa mga payo ko at wala kang takot mapariwara ang buhay mo kapag sinundan ang footprints ko, try mo lang. Totoong napakasakit na may minamahal ka pero wala namang ganting pag-ibig, ngunit kung solid ang love na 'yan, hindi ka na mangungulit na humingi ng bagay na hindi niya kayang ibigay. Malay mo naman, makikita ka pa rin niya habang nariyan ka pa at hindi kung kailan wala ka na.

Let's drink to that!

Lady S

Image: Some rights reserved by McBeth.