The Philippine Online Chronicles

Dear Lady S:

Sumulat po ako sa inyo dahil nais kong humingi ng payo tungkol sa aking suliranin. Nagtatrabaho po ako sa malayong bansa (di ko na po sasabihin kung saan at baka manganib ang aking katayuan), may-asawa at anak. Ang bumabagabag po sa akin ay ang tungkol sa aking girlfriend na iniwan ko sa Pilipinas.

May pamilya din siya. Actually, childhood friend ko siya and we grew up together. Noon pa man ay malaki na ang aking crush sa kanya pero di po niya ako pinapansin. Lumipat po sila ng tirahan noong college na kami kaya wala na akong naging balita sa kanya. Sa Facebook kami muling nagkatagpo hanggang sa mula noon, nagpapalitan na kami ng mga emails, text at paminsan-minsan ay nagtatawagan na rin sa telepono. Sobra akong naging excited dahil ang babaing ito ang siyang unang-unang nagpatibok ng aking puso. Para pa ngang ikinasiya ko ng aking malaman na hindi naging successful ang kanyang married life.

Umuwi ako ng Pilipinas noong 2008 at makalipas ang halos 30 yrs, muli kaming nagkita. Actually, sa aming pagsusulatan at text ay tila nagkakahulugan na kami ng loob hanggang sa maramdaman kong gaya ko ay may pagkakagusto na rin siya sa akin. Noong una ay nararamdaman kong pinipigilan niya ang kanyang damdamin ngunit kinalaunan, napaamin ko rin siya sa totoong nararamdaman niya para sa akin. Isang bagay pa, kyut pa rin siya. At... gusto ko pa rin sa kabila ng mahabang panahon na aming ipinagkalayo.

Lady S... naging masaya kami sa aming patagong relasyon. Alam kong mahirap ang long distance affair pero we tried to work it out. Naging very intimate ang aming naging pagkikita na sinundan ng muli kong pagbabalik sa Pilipinas noong 2009. Alam kong nahihirapan siya sa ganitong set-up pero dahil mahal niya ako ay kinaya niya ang lungkot ng aming sitwasyon. Wala siyang demands. Masaya na raw siya kahit malinaw ang boundaries na nakapagitan sa amin.Isang beses sa loob lamang ng isang taon kami kung magkita sa halos tatatlong oras lamang. Selosang masyado ang aking asawa at gwardiyado ako kaya hindi ako makatakas upang makipagkita sa kanya.

Sa hindi ko maipaliwanag na dahilan, nanlamig ako sa kanya. Marahil ay dahil nga masyado kaming malayo sa isa't isa at kapwa kami abala sa aming mga trabaho. Dumalang ang aming sulatan na naging dahilan upang tanungin niya ako ng diretso kung nasaan na ba siya sa puso ko. Unti-unti, sinikap ko siyang iwasan. Lahat ng tawag ,text at sulat niya ay hindi ko sinagot. Hanggang sa tapatin ko siya through a text message na I am losing interest in her. Sa text message ko na lamang ipinaabot sa kanya na gusto ko nang tapusin ang aming relasyon. Sabi ko, nakukunsensiya na ako dahil niloloko ko ang aking pamilya.

Wala siyang isinumbat sa akin. Ngunit damang-dama ko sa huling mensahe niya ang bigat ng aking desisyong makipaghiwalay na sa kanya. Umiyak siya. Alam kong labis-labis ko siyang nasaktan. Ang inaalala ko ay baka kung ano ang gawin niya. Uuwi ako sa Pilipinas sa susunod na buwan at iniisip ko kung kaya ko ba siyang harapin.

Payuhan mo ako, Lady S. Dapat ba o hindi na dapat na makipagkita pa ako sa kanya?

Nagmamahal,

Vhoy

Sa susunod, ang payo ni Lady S sa problema ni Vhoy. Abangan!

Photo: “first love/ last love” by Emily Martin, c/o Flickr. Some Rights Reserved