The Philippine Online Chronicles

Pelikulang Pinoy sa Int'l Film Fests

Ilang lokal na independent Filipino films ang naimbitahan sa international film festivals.

Kabilang dito ang Siglo ng Pagluluwal (Century of Birthing) ni Lav Diaz na magkakaroon ng world premiere sa Venice International Film Festival sa Italy mula Agosto 31 hanggang Setyembre 10.

Itatampok din sa Windows on Asia section ng Busan International Film Festival sa South Korea sa Oktubre ang Nono ni Rommel “Milo” Tolentino, Isda (Fable of the Fish) ni Adolfo Alix Jr., at Maskara ni Laurice Guillen.

Magkakaroon din ang Isda ng international premiere sa Visions section ng 36^thToronto International Film Festival sa Canada sa Setyembre 8 hanggang 18. Kabilang din dito ang Siglo ng Pagluluwal (Visions) at ang Ars Colonia ni Raya Martin para naman sa Wavelengths program.

Inaasahan ding itatampok sa mga festival sa North Africa, Italy, Germany, United States, at India ang Boundary ni Benito Bautista.

Napili rin ng New York-based na Visit Films ang Isda para sa worldwide sales, kung saan kasama ring napili ang dokumentaryo kay Arnel Pineda na Don't Stop Believin': Everyman's Journey ng Filipino-American na si Ramona Diaz.

Inimbitahan din sa Vancouver Filipino Indie Festival ang Ligo na U, Lapit na Me ni Erik Salud. Nasa official line-up naman ng Silent River Film Festival sa Irvine, California at Kansas International Film Festival ang dokumentaryo ni Ferdinand Balanag na Walking the Waking Journey.

Nicholas Sparks darating sa bansa ngayong Oktubre

Darating sa bansa ang Amerikanong nobelista na si Nicholas Sparks para sa isang book-signing tour ngayong Oktubre.

Ayon sa Facebook page ng Powerbooks, kinumpirma nito na pangungunahan nila ng National Book Store ang book-signing ni Sparks sa bansa.

“Due to the large number of inquiries we have received, we would like to confirm that Powerbooks and National Book Store will be hosting Nicholas Sparks for a book signing tour in October here in Manila,” nakasaad sa kanilang Facebook page.

Kinumpirma rin naman ng nobelista sa kanyang Twitter account na tutungo nga siya sa Pilipinas sa Oktubre 27 at 28. Sinabi rin ni Sparks sa kanyang Twitter account na taga-Maynila ang kanyang tiya na nagturo rin sa kanya ng Tagalog.

Si Sparks ang nasa likod ng mga popular na nobela na ginawa ring pelikula katulad ng The Notebook, Message in a Bottle, A Walk to Remember, Dear John, Nights in Rodanthe, at The Last Song.

Nakatakda ring lumabas ang bago niyang nobelang The Best of Me ngayong Setyembre.